Full time
Full time
Un konsepto di lei pa miembronan di Konseho Insular bira “fulltime” a keda prepará for di añanan 1990.Na aña 2000 partidonan den Konseho Insular (MAN, FOL, PNP, PAR, PLKP i ORDU) a duna nan aporte pa trese adaptashon i korekshon na e lei aki pa por a tuma desishon al respekto.
Prinsipio di e lei aki tabata, pa kada persona ku pone nan mes eligibel riba lista di un partido polítiko i keda elegí, risibí un salario pa ehersé e trabou di 8 ora den Konseho Insular (“fulltime”) ku un disponibilidat di 24 ora pa dia. Pues e persona ku bira miembro di Konseho Insular mester aseptá dispensashon for di su trabou òf kita for di e trabou ku e ta trahando na momentu ku e drenta Konseho Insular, pa e por fungi komo sirbidó di pueblo pa e 4 añanan ku e ta forma parti di Konseho Insular.
E sistema te na 2000 tabata, ku e miembro di Konseho Insular tabata keda ku nan trabou i nan entrada i aparte di esaki tabata risibí un kompensashon di fl. 2000,- pa fungi komo miembro di Konseho Insular, ku e konsekuensha ku mayoria miembro tabata asistí solamente na reunionnan públiko ku tabata ser transmití, ya ku durante di siman nan mester a presentá na nan trabou ku no ta esun den Konseho Insular.
E konsepto di lei ku a keda presentá na aña 2000 tabatin komo meta, pa miembronan di Konseho Insular dediká nan mes kompletamente na e trabou ku nan mester hasi pa pueblo, esta asistí na tur e reunionnan di e diferente komishonnan i laborá tur dia den Konseho Insular.Pa e trabou aki di 8 ora i e disponibilidat di 24 ora pa dia e miembro lo a risibí alrededor di fl. 7.900,--.
Na aña 2000, 12 miembro for di e partidonan MAN, FOL, PNP i ORDU a vota pa e lei aki drenta na vigor.Nèt promé ku a disidí riba e lei aki, a bini un proposishon pa hasi e asuntu aki tòg opshonal, kitando asina e karakter obligatorio for di e lei i e trabou manteniendo e oportunidat, pa solamente “esnan ku ke” aseptá e areglo aki, miéntras otronan por a mantené nan trabou i nan entrada i e kompensashon di fl.2000,- huntu ku esaki.
E miembronan di Konseho Insular pues a mantené e oportunidat pa “kome for di dos tayó” esta: gana un bon salario na nan trabou, kobra e kompensashon di fl. 2000,-- i bini reunionnan ora nan haña ta bon.
Pa partido “Un Pueblo Nobo” esaki no ta e mihó forma pa sirbi e pueblo ku a elehíbo pa hasi e trabou ku a skohe bo pa hasi.E trabou di miembro den Konseho Insular no ta un djòp, pero un trabou serio, responsabel, dediká, kaminda esun elegí pa pueblo mester sali na interes di e pueblo ku a duna é i su partido e oportunidat pa ta su representante durante 4 aña.I si e miembro di Konseho Insular no ta aseptá di traha e trabou ku pueblo a skohé pa hasi “full time”, e no mester ta riba un lista polítiko.
Esaki ta e bèrdat ku partido “Un Pueblo Nobo” ke presentá pa abo pueblo husga pa bo mes, pasobra den pasado hopi hende a keda influenshá ku informashonnan robes orkestrá pa kontrinkantenan polítiko, stigmatisando asina sra. Josephine Bakhuis-Trinidad pa algu di prinsipio ku e huntu ku 11 miembro mas a vota pe drenta na vigor esta: “E prinsipio di ta trahadó “fulltime” na interes di i pa pueblo”Den Konseho Insular ta 21 miembro ta vota i desishon ta kai na banda di e mayoria ku ta 11.
E partidonan ku a forma e mayoria na aña 2000 pa e inisio di “fulltime” komo unu opshonal tabata MAN, PNP, FOL, ÒRDU. en espera di un desishon pa despues “fulltime” bira obligatorio. Te ku dia di awe ningun desishon no a kai pa miembronan den Konseho Insular obligatoriamente ta “fulltime”.Al kontrario e ehèmpel ku nos ta mira ta unu di un Konseho Insular ku regularmente ta bringa ku otro na lugá di ta un ehèmpel di profeshonalismo pa tuma desishonnan serio na interes di e pueblo.
PUEBLO HUSGA PA BO MES