E vishon

E vishon

M’a realisá ku mi tin un yamada, un vishon.

Si mi sera boka skonde kara pa mandato i gritunan di nesesidat,

E tormento ku ta lanta kabes den mi paden lo no sasia. 

Maske e vishon ta pasa mi límite di konosementu,

I kada bes mi ke purba hala tras,

Lo mi lucha te na morto buska kaminda pa mi kue,

Hende pa kompaña mi i instrumento pa yudami.

Pero tur esten.......

Laga resoná bos nobo,

Bos di speransa.

Un bos ku ta karga tononan

ku ta pregoná prosperidat, harmonia i felisidat genuino.

Laga supla un bientu nobo,

Bientu di transformashon,

Transformashon di pensamentu, mente i kurason.

Laga basha un yobida nobo,

Yobida kargá ku gotanan ku ta laba impuresa.

E impuresa ku ta stroba hende di mira

Abilidat, kapasidat i talento.

Laga ku for di un simia por sali raisnan

Di integridat, rèspèt, disiplina i rektitut.

Raisnan ku lo ankra na tera ku un fortalesa inderotabel.

Laga pa di bèrdat balor propio vense kompleho,

Moral haltu vense engaño,

Perseveransha vense

I rèspèt pa Dios vense tur kos.

Laga tera brak para bira tera fértil,

Laga pueblo mansu bira pueblo ku balor,

Laga e lucha ser guiá pa liderazgo real,

I laga mi mandato, mi vishon di bèrdat hiba na

UN PUEBLO NOBO

Shurminia Rafael, 23 aña

Miembro di direktiva di “Un Pueblo Nobo”