Palabra di un hóben

Palabra di un hóben

Apesar ku hóbennan ta un grupo importante den nos komunidat, pa hopi tempu asuntunan di gobernashon di nos pais tabata leu for di hóbennan. Ekspreshonnan manera polítika ta laf, ta pleita so e hendenan ei ta pleita, ets tabata ser skuchá asina bo menshoná polítika bou di hóbennan.

Sinembargo tin un ola nobo ta lantando. Mas i mas hóbennan ta realisando nan tremendo potensial i e impakto ku nan por tin riba nan komunidat den diferente área.  

Hóbennan no tei simplemente pa representá nan pais den deporte, arte i kosnan negativo manera transporte di droga. Ku debido preparashon i oportunidat, nos hóbennan por duna un bon aporte ku ideanan nobo i fresku den e arena polítiko di nos pais.

Kapasidat pa duna un aporte na nos komunidat no ta dependé di bo edat, sino di desaroyo di bo abilidatnan i formashon di un karakter íntegro ku norma i balornan haltu i di bo dedikashon na nos komunidat.

Pa añanan polítika a fiha su mes riba drechamentu di kaya, ekonomia, finansa, ets. Kosnan ku tambe ta importante bèrdat, pero invershon den desaroyo di nos pueblo, di nos komunidat pa nos por ta un pueblo madurá ku por karga un desaroyo duradero nunka tabata un “issue” importante den gobernashon di nos pais.

E pensamentu nobo aki ku nos Lider Polítiko, sra.Josephine Bakhuis for di 1999 a bini ta vosiferá na un forma inkansabel, ta ser kargá dor di un grupo di hóben ku a dediká debido atenshon na nan formashon intelektual i ku ta realisá ku ta solamente invershon den nos pueblo ta garantia pa un Kòrsou ku komo nashon por para riba su propio pia i enfrentá un futuro den kombibensia ku sobra islanan di Karibe i ku lasonan ku Hulanda ku debí na nos historia lo ta di balor pa nos pais.

E vishon di “Un Pueblo Nobo” pa un pueblo fuerte i madurá no ta solamente unu polítiko, pero mester keda implementá den barionan di Kòrsou, organisashonnan soshal, religioso, kompanianan i tur kas di famia den nos komunidat.

Kontinuashon di un movementu manera esaki ta di gran importansha, ya ku e ta un proseso kua su frutanan lo ser kosechá den añanan ku ta sigui.

P’esei pa “Un Pueblo Nobo” duna un oportunidat na hóbennan ta algu di awor i no mayan.

Hóben, “Un Pueblo Nobo” tin lugá pa bo.    

Quincy Girigorie